Teño a honra de anunciar a miña participación no concerto Arpas Atlánticas, un concerto da Orquestra Folk de Galicia SonDeSeu, que se celebrará o 17 de maio de 2025, no Teatro Afundación de Vigo, coincidindo co Día das Letras Galegas.

Neste espectáculo, que celebra a identidade atlántica a través da música de raíz, formo parte do coro de voces masculinas na interpretación da Suite Cotobade, unha obra de Rodrigo Romaní e Xaquín Xesteira inspirada nas tradicións musicais do concello de Cotobade e composta por encargo do Consello da Cultura Galega. Inclúe o emblemático Pasodobre de Viascón, unha das pezas máis recoñecidas da zona, que neste concerto cobrará nova vida coa incorporación dun coro de voces graves, engadindo forza, presenza e unha dimensión coral inédita a esta melodía.

Arpas Atlánticas é moito máis que un concerto: é unha homenaxe á memoria, á cultura e á conexión musical entre Galicia, Escocia e Irlanda. Contará coa participación especial das recoñecidas arpistas Laoise Kelly (Irlanda) e Mary MacMaster (Escocia), ademais dos solistas da orquestra: Beatriz Martínez, Begoña Riobó e Anxo Pintos.

A orquestra interpretará tamén a Suite San Martiño e estreas como Micelio, de Anxo Pintos, e Escumas Atlánticas, de Rodrigo Romaní. Todo baixo a dirección de Xaquín Xesteira, consolidando a SonDeSeu como unha das formacións máis innovadoras da música de raíz en Europa.

Este concerto está organizado pola Fundación SonDeSeu e Nalgures, conta co patrocinio do Concello de Vigo e coa colaboración da ETRAD (Escola Municipal de Vigo de Música Folk e Tradicional).

🎟 Entradas xa á venda en:
entradas.ataquilla.com – Arpas Atlánticas
Prezo desde 13,60 €