O venres 16 de maio, na véspera do Día das Letras Galegas, o Concello de Cerdedo-Cotobade rendeu unha emocionante homenaxe ás Pandeireteiras de Barro de Arén, nun acto celebrado no Centro Cultural de Cerdedo. Esta iniciativa enmárcase na decisión da Real Academia Galega de dedicar o Día das Letras Galegas deste ano á poesía oral e á música tradicional galega.

As protagonistas foron estas mulleres que, durante décadas, transmitiron xeración tras xeración as cantigas e os ritmos propios da tradición galega. Como recoñecemento ao seu legado, o Concello fixo entrega dun ramo de flores ás súas familias e tamén a dúas das pandeireteiras que estiveron presentes: Maricarmen e Pura, que recibiron con emoción esta mostra de gratitude pública.

O acto estivo conducido por Rubén Troitiño, axudando a poñer en valor a historia e o significado das Pandeireteiras de Barro de Arén no contexto da cultura galega.

Durante a homenaxe proxectouse un vídeo con imaxes e testemuños sobre as pandeireteiras, que permitiu afondar no seu papel como gardiás da tradición oral e musical da zona.

A xornada estivo acompañada pola música dos grupos folclóricos locais, que encheron o espazo de vida e identidade cultural:

• Os Trazantes de Tenorio

• Os Afoutes do Canón de Pau

• Os Abrentes de Cerdedo

• As Pandeireteiras do Val de Quireza

Foula

Todos eles recibiron un diploma de agradecemento por parte do Concello, recoñecendo o seu labor de continuidade da tradición.

No seu discurso, o alcalde Jorge Cubela destacou “o gran mérito destas mulleres por manter vivo o noso patrimonio inmaterial” e sinalou a importancia de recoñecer e poñer en valor a música popular galega como parte esencial da identidade do país.